Mario Sechi

Mario Sechi 'l è un giurnalìsta sardagnól e upiniunìsta televiśìṿ nâ a Uristàṅ al 29 ad Śnar dal 1968. In di sò scrit al gh'à da spés 'n òć marcâ ch'al guàrda a dèstra avénd laurâ p'r i più impurtànt giurnài cunservadór: Il Giornale ad Paolo Berlusconi, fradèl ad Silvio, L'Indipendente, Libero e Il Tempo ad Róma da lò dirèt al dè 'd incō. 'L à culaburâ anc cun al periòdic Panorama dla Mondadori in maṅ a Marina Berlusconi, fióla più granda dal prèmier.

Uriginàri ad Cabras, in Sardàggna, dòp avér imparâ al giurnalìśum a l'Università Luiss a Róma, al taca la sò carèra a L'Indipendente in dal 1992.

In dal 1994 al vèṅ tòlt da Il Giornale, p'r al qual 'l è redadór cap da Gènuva e pò a Milàn. Dal 1998 a 'l Utóbar dal 2001 al dvénta al diretór ad L'Unione Sarda. In dal Nuvémbar dal 2001 al tórna a Il Giornale, a cap dla redasiòṅ rumàna. Dòp siē an, in d'l Utóbar dal 2007 al taca a lauràr al setimanàl Panorama da Róma cun 'l incàrag ad diretór in secónda. In d'l Agóst dal 2009 al s trasferìs a Libero cun i stès còmpit.

A partìr da 'l 8 ad Favràr dal 2010 'l è al diretór dal giurnàl rumàṅ Il Tempo.

Al tîn a drē a la pulìtica ad cà nòstra e furastéra, al dà 'n apòǵ a la rivìsta pulìtica Ideazione e al scriv ad geupulìtica e diplumasìa in sla rivìsta Emporion.

Al 24 ad Setémbar dal 2010 'l à vins la prima edisiòṅ dal prèmi ad giurnalìśum L'isola che c'è, 'n arcgnusimènt dat a déś giurnalìsta sardagnól cuma lò ch'i lavóran a Róma in dla carta stampàda o a la RAI.

In dal Nuvémbar dal 2010 al dà adòs a la traśmisiòṅ ad Rai 3 Vieni via con me cun 'n artìcul ad fóg còntra Fabio Fazio e Roberto Saviano dand-ag di fasióś.^[1]

Mario Sechi al gh'à na paǵna in Twitter e in Facebook.

• (IT) Al sò sit uficiàł